【Emily】向雨災災民sell過渡屋 何永賢：可即住

【明報專訊】本港上周四晚至周五經歷雨災後多區嚴重水浸，部分村落如茶果嶺村嘅居民需要疏散，大潭紅山半島更有山坡崩塌。房屋局長何永賢就趁機宣傳過渡房屋項目，話如果受風雨影響、又有迫切住屋需要嘅家庭，可以申請能夠即時入住嘅過渡房屋，佢推介嘅項目包括喺赤柱嘅尚晉坊。

9．24過渡屋開放日 可睇樓

何永賢噚日喺facebook發文，話極端天氣令部分市民嘅屋企受到影響，例如劏房漏水問題表露無遺。佢話現時6個分別位於赤柱、長沙灣、荃灣同元朗嘅過渡房屋項目已經可以即時入住，呼籲有需要家庭可以申請。多名建制派都有分享帖文，民建聯劉國勳話，房署會為受影響及有迫切需要嘅市民即時申請入住過渡房屋；工聯會鄧家彪就話正協助牛池灣村居民入住過渡房屋。

何永賢又提到，本港未來仲有多個過渡房屋項目陸續落成，房屋局將於9月24日喺旺角社區會堂舉行第二次過渡房屋開放日，屆時會擺設攤位向市民介紹各項目，接受即場報名申請，亦會提供交通接駁畀大家親身到各過渡房屋參觀，當局稍後公布詳情。