【Emily】人代考察莫高窟 話敦煌遊客區熱鬧

【明報專訊】港區人大代表近日去咗甘肅省考察，睇行程都幾豐富，如參觀莫高窟，又喺敦煌世界地質公園嘅月牙泉，於大漠上排排企，豎起拇指讚好打卡影相。除咗景點，佢哋有考察新能源設施、塔式熔鹽光熱發電項目。

港區人代前日經北京轉到敦煌，到達時已經係夜晚，人代沈豪傑話，佢哋去咗敦煌夜市，話當地好多遊客區，好熱鬧，夜市有中國西北嘅特色貨品及香港見唔到嘅食物。

噚日行程就包括參觀莫高窟、月牙泉等遊客景點。人代陳曉峰話，莫高窟係世界文化藝術寶庫，當地文化傳承旅遊產業做得好，喺千佛洞內有400多個洞窟藏有1200多年前手繪壁畫。佢有感而發，話古絲綢之路被取代咗，大家絕對要以史為鑑，要有危患意識，「開發更多由治及興之路」。