【Emily】賀皇仁校慶 舊生會推3888元威士忌

【明報專訊】皇仁書院去年160周年校慶，皇仁舊生會為校慶特別推出一款威士忌（圖），產自蘇格蘭歷史最悠久酒廠之一Ben Nevis，酒樽同包裝由唔同年代嘅皇仁舊生共同設計，話展現皇仁特色。舊生會話校慶特別版威士忌將為一連串慶祝活動畫上句號，每支威士忌售價3888元。

皇仁舊生會宣布推出校慶特別版威士忌，為來自蘇格蘭嘅25年單一麥芽威士忌，由歷史悠久嘅酒廠Ben Nevis限量製造，帶有豐富果香同熱帶香料香氣；酒樽同包裝分別以皇仁嘅8個社同校呔為創作靈感，舊生會形容展現「皇仁仔」嘅身分認同。校慶特別版威士忌只限皇仁舊生購買。威士忌價錢豐儉由人，唔同款售價差好遠，但有舊生同Emily講，3888元唔係細數，唔係個個皇仁仔都捨得買。