【Emily】張欣宇撐羅淑佩追星 讚埋工作能力魄力

【明報專訊】已公開認係「Hellosss」（MIRROR成員陳卓賢粉絲）嘅房屋局常任秘書長兼房屋署長羅淑佩，日前被其他粉絲影到無懼惡劣天氣，喺上周六（9日）前往機場追星，引起網民熱論。立法會議員張欣宇噚日發文力撐，話無論係咩級別嘅公務員，有自己正常嘅愛好同興趣，公餘時間參加更係平常不過，唔需要過多指摘。

張欣宇喺facebook發文話，過去一年幾嘅時間，就交通運輸議題上曾同羅淑佩有好緊密嘅交流合作，雖然未必可以喺政策議題上達成共識，但讚羅嘅能力、魄力同敬業，贏得佢同好多人嘅尊重。

佢又話，喺一啲其他中基層公務員口中亦了解到，房屋署喺黑雨期間嘅抗災工作都喺羅淑佩緊密督導下，處理得井井有條，「根據我們在地區看到的情况，公共屋邨除了升降機故障較多以外，在世紀水災期間基本沒有發生大問題和事故」。佢仲讚咁樣嘅公務員，香港應該愈多愈好。

「追星正常」 有網民話唔明鬧乜

帖文內容獲部分網民支持，有人留言話「署長都係人，收工後其實都係一個普通香港市民，正如有人興趣係飲酒，打Golf，追星係完全正當行為，唔明網民有咩好罵」。