【Emily】去輕鐵廠開放日 田二少喜遇九鐵舊員

【明報專訊】為慶祝輕鐵服務35周年，港鐵搞咗唔少活動，包括噚日嘅屯門輕鐵車廠開放日，仲停泊咗5個唔同時期嘅列車畀人打卡影相，活動吸引咗4000名市民參加，當中唔少係鐵路迷。前九鐵主席田北辰都有趁熱鬧，話好彩搶到啲飛，佢嘅實政圓桌團隊可以帶埋街坊一齊去參觀，田二少仲帶埋3個外孫去玩。

屯門車廠噚日設有多個以輕鐵為主題嘅「打卡點」，有互動遊戲攤位，亦有唔同年代嘅輕鐵物品展覽，市民仲可以參觀已經退役嘅第二期輕鐵「孖卡」車輛。

田二少帶埋孫仔孫女參加活動，話開心見到舊時「九鐵」年代嘅車長及舊同事，包括現為港鐵車務總監嘅李家潤，大家打招呼，話對方係一個好念舊嘅人，仲記得佢曾經係九鐵主席，大家仲一齊喺車廠合照。