【Emily】創科局「管理參議主任」 獻策各部曾試推Chatbot

【明報專訊】政府日前開展聯合招聘6個職系，公務員事務局噚日發文介紹「管理參議主任」（MSO）呢個職位。Emily睇過先知，原來MSO隸屬創新科技及工業局轄下效率促進辦公室，既係政府內部嘅管理顧問伙伴，亦係各部門嘅創新智囊。高級管理參議主任陳秀婧（Alice）都喺帖文中分享加入MSO團隊嘅工作體驗。

Alice話創新開放嘅思維係做MSO好重要嘅特質，唔止要緊貼全球公共服務改革同創科新趨勢，仲要推出創新點子優化政府服務運作，到唔同決策局同部門工作。佢印象最深刻嘅有兩個項目，包括試行聊天機械人（Chatbot），透過「自然語言處理」人工智能科技，智能助理就可於網站即時解答市民問題，而加上語音轉文字技術嘅語音機械人，令市民又快又方便咁透過電話同智能助理對話；另一個係用航拍機，加上人工智能技術同合適嘅雲端平台，喺指定地方做檢查，慳番唔少人力物力，提高工作效率同服務質素。

聯合招聘考試12月2日（星期六）舉行，公務員局提醒，新一輪聯合招聘10月6日下午5點就截止。