【Emily】環翠停車場裝水浸感應器 遇積水發警報 另增設大水泵

【明報專訊】早前「世紀黑雨」，柴灣環翠邨停車場水浸到頂，浸壞幾十部車。民建聯立法會議員梁熙噚日同業主領展及停車場管理公司代表見面，仲去停車場睇過，領展代表同佢介紹，喺「世紀黑雨」及其後嘅紅雨過後，環翠邨停車場加裝咗水浸感應裝置，話一旦唔同位置有積水，會即時通知管理中心。梁熙話停車場亦已加裝大型水泵，應付未來突發情况。按梁熙提供嘅圖片所見，停車場牆腳位置裝咗一啲感應器，牆身亦裝咗有水浸標記嘅警報器。

領展話黑雨當晚有通知車主開走

梁熙同Emily講，收到車主求助，車輛因水浸報銷，而佢約咗車主過幾日開會，會搵埋法律界人士畀意見點追討。

梁熙噚日同領展方面開會，對方同佢講，黑雨當日停車場有致電通知車主，部分車主及時趕到開走座駕，但部分人話無收到，亦有人因為來電「3」字頭而無理到，最終有30部車浸水。領展又話喺其後嘅紅雨，職員都有打電話同發短訊通知車主。梁熙話停車場本身有抽水泵，但領展話黑雨當晚泥水沙石由柴灣墳場方向湧來，搞到水泵都塞埋損毁。