經濟
WeChat Pay送電子現金券 吸港人深圳消費
【明報專訊】港人北上消費熱潮唔使多講，臨近中秋節同國慶假期，WeChat Pay HK都繼續趁機搶客，噚日宣布聯乘超過30個深圳商場，即日起至2023年10月15日推出「港人專屬得獎賞」，平台仲會送出3張、合計價值10元嘅「內地消費電子現金券」，務求谷起北上消費！
WeChat Pay HK同位於深圳福田區、羅湖區、南山區、寶安區、龍華區、龍崗區合共超過30個商場合作，例如深業上城、福田星河COCO等商場。小琴留意到，除咗唔少餐廳優惠，仲有足療、戲院等，假期北上消費就記得要拎定優惠券。
使用規則較複雜 拎完翌日才可用
WeChat Pay HK仲會送出3張總值10元內地消費電子現金券，不過留意返，3張電子現金券包括買滿20元減2元、30元減3元、50元減5元，使用規則較複雜。首先要用完第一張2元現金券，先會拎到下一張3元現金券可以即日用；而3元現金券用完之後先拎到5元現金券，拎完第二日先可以用㗎，大家記得睇清條款。
