【Emily】李家超抵杭州 入選手村勉港隊 霍啟剛讚亞運村「環境唔錯」似屋企

【明報專訊】杭州亞運會今晚開幕，特首李家超噚日率團到咗杭州，下晝先去運動員村參觀，同行仲有文體旅局長楊潤雄。李家超喺facebook話今次會到比賽現場為香港運動員打氣，又話今屆運動員經歷疫情期間體育盛事延期或取消，但都無放鬆訓練，鼓勵佢哋全力以赴，為港爭光。

楊潤雄就喺fb讚選手村環境唔錯，食物款式多，支援人員熱誠服務。今次港隊參賽人數破紀錄，康文署網站特登開設亞運直播區，今日下晝6點會開始直播開幕式啟動禮，而今晚8點起至10月8日亦會開放轄下36間體育館直播亞運賽事，每日朝早8點開到晚上10點半。聽日開始會有劍擊個人賽事，港隊嘅張家朗、蔡俊彥、江旻憓同佘繕妡等將出戰。

36體育館今晚起直播亞運

另外，身兼港協暨奧委會副會長嘅香港亞運代表團團長霍啟剛噚日朝早亦到咗杭州，喺雨中參加港隊嘅歡迎儀式同升旗儀式。佢都讚亞運村環境唔錯，話入到去好似返屋企咁，仲呼籲市民記得睇開幕式，為國家隊同港隊加油。