【Emily】前律師會長兼政協 彭韻僖獲委中大校董

【明報專訊】中文大學校董會改組，預計立法會10月復會再審議。政府噚日刊憲公布，特首李家超以校監身分委任律師會前會長兼全國政協彭韻僖（Melissa）做中大校董，任期3年，即日生效。與此同時，早前多次公開評論校董會改組嘅中大校友評議會主席楊于銘，本身8月底任期屆滿卸任校董，由於評議會之後會選出新主席，預計楊唔會再連任校董。

陸觀豪校董席位懸空

Melissa今次獲委任，相信係因為德勤亞太主席周志賢接替資深大律師梁定邦做司庫，懸空一個校監委任校董席位。至於早前資深校董陸觀豪辭任嘅校董席位，暫時就未有新委任。

睇番由特首委任嘅6名校董入面，連埋Melissa在內有3個具法律背景，另外兩個分別係港區人大代表陳曉峰同退休裁判官黃汝榮，兩人首個任期分別去到2025同2026年。