【Emily】消委續查黑客影響範圍 籲《選擇》訂戶改密碼

【明報專訊】消委會電腦系統日前被黑客入侵，近八成電腦系統受損。消委會噚日向《選擇》月刊訂戶發電郵，除交代黑客入侵事件，亦提出多項措施建議，等用戶考慮採取預防措施保護個人資料，包括重設同定期改密碼、檢查有冇可疑活動、帳戶有冇不尋常登入等，仲提醒話佢哋唔會透過電話、短訊、電郵向用戶索取或核實個人資料，呼籲大家提高警覺，如收到聲稱係消委會嘅電話、短訊或電郵就要核實來源。

消委會喺電郵提到，事後佢哋已即時採取行動，包括報警、主動向個人資料私隱專員公署備案等，?家就做系統復修工作，同鑑證專家、警方合作，提升安全措施。至於邊類人嘅資料會受影響，消委會話調查緊，但從風險評估，消委會員工、選舉月刊訂戶、投訴人、求職者、合作伙伴等有可能受影響。早前消委會先舉行消費權益新聞報道獎公眾投票，參與投票公眾都有提交部分個人資料，包括姓名、電話、部分身分證號碼，消委會就話到目前為止冇證據顯示個人資料被盜用，但因為啲個人資料儲存喺受影響電腦系統，故未能確實排除到被盜取嘅可能。