【Emily】星之子：唔夠主動者或快被AI取代

【明報專訊】ChatGPT（AI聊天機械人）等科技突破，引發廣泛討論人工智能係咪會有一日取代人類，「星之子」陳易希接受恒生大學節目《恒傳感言》訪問時就話，唔夠主動、「人哋踢踢你先郁」嘅人可能好快會畀人工智能取代。佢仲話，每項新技術都有正面同負面影響，要視乎係咪用得其所，舉例話核能可用作源源不斷嘅能源，亦可以用嚟製造武器，強調人工智能不可怕，可怕嘅係人類。

倡大學研ChatGPT檢視教學

對於唔同大學對ChatGPT態度唔同，陳易希就話，ChatGPT已經係不可逆轉嘅趨勢，教育界應與時並進，教導學生如何使用有關技術。佢提到，今時今日科技界面試，求職者識得應用ChatGPT係一個取錄因素，話大學應成立研究部門針對ChatCPT檢視教學，包括評核方式等。

創業10多年、曾係創新及科技諮詢委員會委員嘅陳易希認為，?家嘅創業氣氛已經比佢創業時大大改善，但仲係有95%初創企業失敗，話政府應思考如何幫助初創企業持續發展。佢回憶創業初期，一日可能只瞓4、5個鐘，又話遇到困難時要有「天跌落嚟當被冚」嘅心態。