【Emily】助威院整月餅 灣區護士獻「第一次」

【明報專訊】每逢佳節倍思親，兩名來港交流嘅大灣區護士李丹琴、劉佳麗今年中秋雖然無得陪屋企人，但早幾日就同一班威爾斯親王醫院嘅同事齊齊走入廚房整月餅，一個負責壓平餅料，另一個處理紫薯蓉同仿蛋黃餡料，包好之後放入模具，倒出嚟再攞去焗。由於月餅不含防腐劑，佢哋即日已經將月餅分發去病房，為病人送暖。

今次係李丹琴、劉佳麗第一次整月餅，亦都係第一次喺香港過中秋。劉佳麗話「有月光照亮的地方就是家」，以往都試過喺醫院過節，上年就用柚皮整花燈，醫護仲會同病人唱歌。李丹琴就第一次唔喺屋企過中秋，話威院同事知道後都有送月餅應節，非常熱情。

原來威院醫護每年中秋都會為病人製作健康月餅，至今超過20年。新界東醫院聯網總監兼威院行政總監鍾健禮今年都有落手參與，威院共派發約800個自家製紫薯月餅，由紫薯代替蓮蓉可以做到低糖低油，再用番薯製成鹹蛋黃嘅樣，令病人更有應節感覺。