【Emily】施政報告明出爐 李班子戴知專師生設計綠領呔領巾

【明報專訊】特首李家超聽日會發表任內第二份《施政報告》。為咗配合封面採用嘅綠色，佢喺facebook表示，屆時將會同一眾官員穿戴由香港知專設計學院（HKDI）師生設計嘅綠色領呔同領巾，藉此鼓勵社會各界為年輕人提供更多機會發揮創意、盡展所長，同時展現問責團隊嘅「隊形」同團結精神。

鼓勵社會畀機會青年發揮創意

今年《施政報告》封面同舊年一樣，繼續用綠色，李家超話係象徵施政帶來希望、生命力、和諧穩定。佢話聽日到立法會宣讀《施政報告》時，會同問責團隊一齊穿戴一款由知專設計學院師生設計嘅綠色領呔同領巾。佢話領呔同領巾靈感源自中國古代歷朝花紋，代表唔同時期嘅文明風貌，設計亦加入現代元素，承傳中國傳統文化。

李家超聽朝11點會喺立法會宣讀《施政報告》，下晝3點半就會出席記者會，傍晚7點再參與電視論壇。《施政報告》全文將喺20個民政諮詢中心派發，列出重點內容嘅單張可以喺7間主要公共圖書館同61個公屋商場索取。