【Emily】故宮館X本地藝術家 多媒體演繹園林美學

【明報專訊】香港故宮文化博物館今日起有全新專題展覽「山林市城──遊歷舊園新景」，展出8位跨領域香港藝術家創作嘅7件多媒體作品，以嶄新角度詮釋中國傳統園林美學，為觀眾提供多重感官觀賞體驗。

新展覽設喺博物館展廳7，預計為期一年。藝術家之前去過北京實地考察各個名園，其中作品《重塑景觀》受私家園林以小見大嘅特點影響，仲有受到故宮藏品「元音壽牒」組印、喺青田石上嘅雕刻啟發，以較小嘅空間結合家居同園林，創造出內外結合嘅無限景色。另一件作品《我此心之所動》就透過感應器檢測觀眾脈搏，再變成獨特嘅水墨山水畫。

M+ 11．12免費入場

另外，M+博物館下個月12號就會迎來開幕兩周年，嗰日會免費開放畀公眾入場，訪客可免費參觀標準門票涵蓋嘅所有展覽同節目，毋須預約，開放時間係朝10晚6，市民要經藝術廣場入口進入博物館。館方話會限制入場人數，訪客可能要喺入口外按工作人員指示排隊輪候，下晝4點截龍，確保入場嘅人有足夠時間參觀。