【Emily】親友電子預約探監 懲教下月推 探訪者須為在囚者申報訪客 3方法登記

【明報專訊】近年愈嚟愈多政府服務電子化，懲教署噚日宣布，下月起會全面推行在囚者親友探訪嘅電子預約服務，縮短探訪者喺懲教院所輪候登記探訪嘅時間，亦可以畀探訪者透過系統管理預約、查詢在囚者最新探訪狀况同認可交來嘅物品餘額。署方話，已登記嘅探訪者將可透過應用程式「智方便」或登入官網，預約未來7日嘅探訪時間；而相關服務推出後，探訪者仍可以去懲教院所作探訪登記。

據懲教署講，探訪者必須係在囚者嘅申報訪客並且要預先完成用戶登記，先可以用親友相關嘅預約服務。探訪者噚日起可以透過3種方法登記，包括用「智方便」登記；喺懲教署官網或應用程式，連結到親友探訪電子預約服務網頁提交申請，再親身到有關在囚者所在嘅懲教院所核實身分；又或者直接到有關在囚者所在懲教院所，提交申請及核實身分。署方提醒，探訪者完成用戶登記程序後，亦須得到在囚者同意先可使用相關服務。

舊年《施政報告》提到喺2025年或之前，推動所有政府部門採用「智方便」，為市民提供方便同一站式電子服務。前日發表嘅《2023年施政報告》形容「符合進度」，又話政府資科辦已得到立法會撥款提升「智方便」。