經濟
「新世代混血男神」任譚仔15周年代言人
【明報專訊】譚仔國際（2217）旗下譚仔三哥今年8月踏入15周年，噚日宣布「新世代混血男神」Jeffrey（魏浚笙）擔任譚仔三哥15周年代言人，Jeffrey仲去埋集團大股東基地日本東京，炮製譚仔三哥15周年主題曲（三歌）《Never Say Never》MV，以及全「辛」譚仔三哥15周年廣告。
Jeffrey平時出名「零死角」，今次MV化身為去日本追夢嘅漫畫家，亦會有日本殿堂級混血名模藤井莉娜（Fujii Lena）助陣，當然唔少得日本譚仔三哥新宿分店食米線，相信MV一定好好睇！今次除咗有Jeffrey應援活動，登記成為App會員仲有優惠價，fans一定不定錯過喇。
不過靚仔做代言人都撐唔起譚仔股價，噚日收市報1.23元，跌2.38%。集團近年廣告一浪接一浪，小琴睇返集團上個財年條數，原來全年所有地區廣告及宣傳開支加埋用咗6100萬元，唔知今年廣告費又會唔會再升呢？
