【明報專訊】香港面對勞動力短缺，近期多個行業擴大輸入外勞，有騙徒就乘機騙財。香港中華廠商聯合會（廠商會）噚日發聲明話，留意到近日有人假冒會方代表，聲稱可以為內地人代辦特區政府「補充勞工優化計劃」工作簽證，並從中收取費用，廠商會鄭重聲明話從來無提供或委託任何人代辦呢項服務。
廠商會嚴厲譴責呢啲欺詐行為，仲話已經向內地公安同香港警方報案，再次提醒市民提高警覺，唔好上當。政府今年9月4日起推出補充勞工優化計劃，包括放寬容許僱主可以申請侍應、初級廚師、收銀員等26個職工勞工嚟香港工作，反應都唔錯，據勞工處之前回覆Emily，頭一個月已經收到546宗申請，涉及5961個勞工。
