【Emily】保護遺棄動物會要搬址 募捐應付「大遷徙」

【明報專訊】收容動物嘅團體「保護遺棄動物協會（簡稱SAA）」噚日話，11月展開一項名為「SAA動物大遷徙月捐計劃」，原因係佢哋用咗多年、喺元朗白沙村第一段嘅會址，因為納入政府元朗南發展範圍而面臨收地，佢哋要喺2024年年底前搬走。SAA話，過去數月一直努力搵另一個永久住所，安置會內所有動物，好彩嘅係佢哋已經喺石崗搵到新地方，正向相關政府部門提交申請，現時仍在等候審批階段，但搬遷涉及龐大開支，呼籲大家支持。

盼政府盡早批核新址程序

SAA創辦人El Chan透過新聞稿話，現距離遷移期限只有10多個月，佢希望政府及相關部門盡早批核新會址嘅程序，以便SAA盡早展開相關工程，不至令動物流離失所。SAA話，為咗搬遷，佢哋分別設立「SAA動物大遷徙月捐計劃」及「SAA動物大遷徙命名捐款計劃」，籌款所得會與日常營運經費分開。

SAA成立26年，組織話一直堅守「不殺不棄」原則，照顧無人願意收養嘅動物，而目前居於會內嘅動物數量平均年齡達7歲，唔少更有長期病。