【Emily】鄧炳強紗布護發炎右眼 「唔影響表現，應該」

【明報專訊】保安局長鄧炳強噚日出席立法會會議時，右眼用紗布遮住，保安事務委員會代主席簡慧敏甫開首就問候佢，要代眾議員邀請佢解釋咩事。鄧炳強提到因為右眼感染發炎，所以要遮蓋右眼開會，並話「唔會影響表現，應該」，引來一眾議員笑聲。

隨後好多發言議員都慰問鄧炳強，包括早前因左眼視網膜脫落做手術、「單眼」過一排嘅工聯會鄧家彪，佢話「保護視力猶如保護香港社會一樣咁重要」，期望局長時刻警惕同早日康復。鄧炳強喺會上提到，各青少年制服團隊嘅活躍會員人數，遠超《施政報告》訂立嘅關鍵績效指標。經民聯陸瀚民形容，鄧「負傷上陣」都使命必達，係值得紀律部隊和青少年團隊嘅學習對象。

鄧炳強其間透露，少年警訊1974年成立時佢已加入，而且成績唔錯。工聯會陳穎欣就形容鄧炳強係說好少年警訊故事嘅例子，會向更多少訊成員分享佢嘅經歷，期望有更多成員以貢獻本港為終身志願。

對於有議員鼓勵在校學生參與制服團隊，加入醫療輔助隊逾22年嘅民建聯黃俊碩憶述，由於中一時學校「強烈建議」學生加入制服團體，「培養咗我?家有好多套制服嘅癖好，亦搞到好忙」。