【Emily】水上天后廟「上岸」 原廟船擬改博物館

【明報專訊】有68年歷史、停泊喺銅鑼灣避風塘嘅全港唯一水上天后廟「三角水上天后廟」噚日終於遷移上岸，建成喺岸邊敬記船廠原址，今日起開放畀善信參拜。新廟保留咗廟船格局同特色，例如採用船形設計同廟宇頂部突出樓頂平台，廟外地面塗上綠色，象徵廟宇坐落水上。新廟內有冷氣，香爐喺外面，希望令善信參拜時更舒適。

天后廟開幕召集人及籌委會主席周潔冰話，以前去廟船需要坐接駁小艇，參拜人數受限，加上天氣惡劣亦會有危險，所以因應時代發展搬遷上岸。

周潔冰話，原本嘅廟船經清理後會安排驗船同做保育維修，未來會同旅發局和海濱事務委員會打造成為水上博物館，以成為銅鑼灣地標，吸引更多遊客同善信，預計一兩年後可重開。佢仲話廟船上岸過程由爭取至開幕歷時超過30年，建築費逾千萬元，主因係覓地困難同最終選址原本係沙灘，需重新填平同打好地基。

新天后廟噚日舉行開幕禮，副律政司長張國鈞都有出席，佢話新廟將傳承漁民同銅鑼灣街坊嘅民間歷史同文化回憶，成為受歡迎嘅文化旅遊景點。