【Emily】首間「組裝合成」立會議員辦誕生

【明報專訊】立法會正做擴建工程，第一間以組裝合成法建成嘅議員辦公室噚日誕生。立法會主席梁君彥聯同立法會行政管理委員會成員、建築署長及副行政署長等人噚日去參觀，梁喺facebook話組裝合成法係「砌積木」，但「大有學問」，舉例裝嵌過程要將部件吊起再放到指定位置，要「啱key」先可以令唔同組件「無縫接合」，確保結構安全及有效運作。

大樓新擴建嘅11至14層係議員樓層，每層有15間議員辦公室同會客室、茶水間等其他設施。每間約60平方米嘅議員辦公室由3個部件組嵌而成，包括議員嘅「波士房」，以及兩件職員嘅開放式辦公室組件，新建成樓層需要由超過200件組件建成。

梁君彥又話，第一批組件10月1日先從江門到港。由於有部件闊度超過2.5米，要運輸署特別許可先可以經指定道路運去工地，佢期望每日可完成最多兩間辦公室，趕及年底前完成組裝。