【Emily】李嘉誠捐百萬 助兩癌童質子治療 減少破壞周邊健康組織 適合發育兒童

【明報專訊】今年中落成嘅養和質子治療中心最近獲李嘉誠捐助100萬元，資助兩名由醫管局轄下香港兒童醫院轉介嘅癌症病童接受質子治療。質子治療係利用高能量又精準嘅質子射束瞄準癌細胞，以消滅腫瘤，有助減低對周邊健康組織嘅破壞，對尚在發育嘅兒童癌症患者尤其適合。

兩個小朋友都係由養和醫院臨牀腫瘤科名譽顧問醫生甘冠明主診，其中一名15歲小朋友患有惡性軟組織肉瘤（尤文家族腫瘤），腫瘤位於右側上頜竇，接近眼眶壁，質子治療比傳統光子治療更有助減輕口腔疼痛同口乾，仲會降低聽力、視力受損同繼發性癌症風險；另一名13歲小朋友霍奇金淋巴瘤復發，腫瘤位於頸同縱膈部位，質子治療有助降低輻射誘發心臟病同繼發性惡性腫瘤，例如乳腺癌、肺癌或甲狀腺癌嘅風險。

13及15歲 轉介養和質子治療中心

養和醫療集團營運總監、養和醫院董事李維文話，捐款可以減輕兩個患者家人嘅經濟負擔，又話兒童癌症治療準備過程較成人複雜、時間較長，質子治療對兒童係較好嘅治療選項，減低長遠副作用。