【Emily】政總打流感針 大合照唔多齊人

【明報專訊】各項季節性流感疫苗注射計劃全面展開。特首李家超噚日率領多名主要官員喺政府總部打流感針，不過Emily睇大合照似乎唔多齊人，多個官員都無參加，包括眾所周知最怕打針嘅民青局長麥美娟。民青局回覆話，局長噚日朝早有其他公務未能參與，稍後另作安排。

麥美娟仍出任立法會議員嘅時候，已經出晒名驚打針，支針一拮落手就面容扭曲。佢喺fb分享過，年過八旬嘅爸爸一直好抗拒接種新冠疫苗，自己要千方百計說服佢打針，先忽然醒覺原來怕打針係遺傳。

怕打針麥局長「有公務未能參與」

至於其餘無影合照嘅官員有無打針？運物局回覆話，局長林世雄因參與會議未能出席，稍後會安排接種，而副局長廖振新有參與。房屋局長何永賢噚日朝早就要出席建造業議會研討會，但喺fb話會約醫生打番。副律政司長張國鈞喺fb話，同家人最近去家庭醫生度打咗針，呼籲市民盡快接種。勞福局就口頭答覆話，局長孫玉菡噚日有一齊打針，但因有公務而無合照。發展局回覆話，局長甯漢豪早前已經接種。