【Emily】政府港協周六辦亞運祝捷會

【明報專訊】杭州亞運噚晚閉幕，港隊呢屆取得8金16銀29銅佳績，特首李家超噚日喺facebook話，政府同港協暨奧委會將於周六（14日）舉行祝捷會。文體旅局長楊潤雄就讚揚港隊全力以赴，展示體育精神，更取得亮麗成績，話今日會去機場迎接代表團表達祝賀。

李家超話，政府會繼續不遺餘力推動本港體育發展，促進體育事業喺精英化、盛事化、普及化以外，向更專業化及產業化嘅方向發展。政務司長陳國基噚日聯同體育專員黃德森去咗亞運選手村，同村長李火林會面，又聯同港協暨奥委會會長霍震霆、亞運會中國香港代表團團長霍啟剛，跟10多位香港運動員交流。

陳國基喺fb向健兒承諾，政府會繼續全力支援精英運動員喺學業同運動方面雙軌發展，以鼓勵更多青年運動員投身全職運動員行列；體育專員亦承諾賽後與唔同項目嘅運動員繼續緊密溝通，了解佢哋所需並適切協助。

立法會主席梁君彥亦喺fb祝賀港隊凱旋，讚戰績彪炳。佢話立法會將繼續同政府及社會各界攜手推廣普及運動，期望日後有更多體壇新星迸發光芒。