港聞
【Emily】孖工會朋友踩車 林振昇夜遊天安門
![](https://news.mainpao.com/wp-content/uploads/2023/10/20231010210122-6525bba2a2047.jpg)
【明報專訊】中國工會第十八次全國代表大會前日喺北京召開,吳秋北、林振昇同周小松等一眾立法會議員作為香港工會代表都有北上參加。難得去到北京,林振昇前晚就約埋工會朋友踩單車,夜遊北京天安門同王府井大街,仲讚當地公共交通系統同配套好完善。
林振昇噚日喺社交媒體分享,話趁住呢個難得嘅機會,同吳秋北、周小松,仲有其他工會朋友一齊踩單車遊覽夜晚嘅天安門廣場同王府井大街,佢話只要透過電子支付系統就可輕鬆租到共享單車,簡直係方便又快捷,路上仲有多個停車點,可以畀人停低欣賞靚景。
周小松話內地嘅共享單車發展蓬勃,今年上半年北京全市共享單車嘅騎行量達到4.86億人次,共享單車可以話係北京市民「出行『最後一公里』嘅重要交通工具」,呢方面好值得香港借鏡。
林振昇就話,即使到咗夜晚10點,長安大街仲有好多人踩單車,感受北京嘅夜繽紛,其中唔少係遊客,增添咗旅行嘅趣味。佢哋踩單車穿梭熱鬧嘅北京,都係一次美好難忘嘅體驗。
繼續閱讀
![](https://news.mainpao.com/wp-content/uploads/2024/05/bet365.ooo_.png)