【Emily】嶺大新校長秦泗釗：引領北都高教發展

【明報專訊】嶺南大學噚日舉行「2023年榮譽博士頒授典禮暨校長就職典禮」，由國際知名數據科學專家秦泗釗教授接任新校長。佢致辭時話，社會嘅需求同期望不停改變，大學將為師生免費提供ChatGPT同GPT4.0，以融合傳統課程同數字化；又會積極喺大灣區內建立合作伙伴關係，同埋充分利用毗鄰深圳嘅優勢，引領「北部新城」（即北部都會區）高等教育嘅發展。佢仲提到嶺大會致力培養歸屬感及認同感，亦會推動擁抱多元文化。

嶺大介紹秦泗釗時，話佢係世界上卓有名聲嘅領導人才同成就斐然嘅科研學者。佢執掌嶺大後，會致力將嶺大發展成為一間喺數位時代享譽國際嘅研究型博雅大學。

另外，嶺大亦向5人頒授榮譽博士學位，包括諾貝爾物理學獎得主丁肇中、香港上海匯豐銀行副主席兼行政總裁王冬勝、電影史學家兼港產片權威David Bordwell、運營管理和運籌學科學家Mahesh Nagarajan、法律界黃志光。

今年60歲嘅秦泗釗喺山東出生，16歲考入北京清華大學主修自動化系統，本科同碩士畢業後，再喺美國取得化學工程博士學位。佢今年9月接任嶺大校長，任期5年。