【Emily】UNICEF慈善跑 籌逾765萬

【明報專訊】經過新冠疫情等因素限制，聯合國兒童基金香港委員會（「UNICEF HK」）舉辦嘅慈善跑闊別4年再度舉行，基金會話，近月來國際社會發生衝突，及災害頻生，今次活動跑手為大會籌得超過765萬元，呢筆善款將投放於全球兒童健康、營養、食水、個人及環境衛生、教育，以及其他與兒童權利相關嘅工作。

郭晶晶黃金寶 一家大細親子跑

慈善跑噚日喺迪士尼樂園度假區及欣澳舉行，約5000人參與唔同組別賽事。UNICEF HK大使郭晶晶同老公霍啟剛議員及子女，一齊參與3公里親子賽；另一大使黃金寶今次唔踩單車，同仔仔一齊參賽。大會並設15公里、10公里及5公里賽，當中15公里賽由香港馬拉松紀錄保持者黃尹雋以49分11秒勝出，姚潔貞則以57分22秒時間衝線，奪得女子15公里賽冠軍。

慈善跑自2006年舉辦舉行，今年為15屆，主題為推動「聯合國可持續發展目標（SDG）3：良好健康與福祉」，而SDG 3旨在確保人人活得健康，避免可預防嘅死亡。