【Emily】黃偉綸去美食嘉年華 食燒賣飲檸茶讚出色

【明報專訊】政府力推「香港夜繽紛」谷夜經濟，其中一連9日喺葵涌運動場舉行嘅「第10屆香港美食嘉年華」噚晚結束。副財政司長黃偉綸感謝廠商會響應「夜繽紛」，延長咗開放時間，等市民放工後可以鬆一鬆，仲話期待下月喺維園舉行嘅工展會，叫市民唔好錯過。

叫市民唔好錯過下月工展會

黃偉綸喺facebook話，日前佢同主辦方廠商會嘅會長史立德、副會長施榮恒，一齊去葵涌美食嘉年華。佢又話，今次係新冠疫情後首次復辦美食區，吸引咗唔少市民去「掃街」醫肚，仲有市民拎住大包細包唔同優惠嘅戰利品，場內人頭湧湧，好鬼熱鬧。佢仲即場買咗燒賣配手打檸檬茶，大讚相當出色，最後買咗啲湯包同零食，支持本地商戶。

中環街市上月亦特別舉辦「德國啤酒節」響應「夜繽紛」，黃偉綸話喺萬聖節前夕當晚亦去咗中環街市，感受節日氣氛，並幫襯小商戶，買咗啲零食與同事分享。佢提到好欣賞活化後嘅中環街市令人耳目一新，除咗有唔同餐廳、酒吧同小店，亦加入藝術文化元素。