【Emily】樹仁榮譽博士頒張竹君林順潮

【明報專訊】香港樹仁大學噚日公布本月27號舉辦第49屆畢業禮暨榮譽博士學位頒授儀式，將向兩人頒授榮譽社會科學博士，以表揚佢哋喺專業領域卓越成就同造福社會嘅莫大貢獻，其中一人係過去3年新冠疫情期間經常主持「430」疫情記者會嘅衛生防護中心傳染病處主任張竹君（圖）。

樹仁大學話，張醫生服務衛生署超過20年，協助處理2003年SARS、2013年中東呼吸綜合症（MERS）及2019年新冠病毒等疫症；仲特別提到，張醫生喺2020至2022年因為頻繁主持疫情簡報會而廣受市民認識同愛戴，話佢最高紀錄曾經連續72日風雨不改主持例行簡報會，報告新增個案同疫情走勢。

另一獲頒榮譽社會科學博士嘅係立法會選委界別議員、眼科醫生林順潮，仁大提到林順潮全球首創使用虹膜周邊激光手術同角膜穿刺術治療急性青光眼，又讚揚佢熱心公益，包括於1999年成立光明行動護眼基金，提高本港市民嘅護眼知識、為有需要者免費驗眼同做手術。