【Emily】港醫學科學家首獲選「新基石研究員」 中大黃秀娟專研腸道微生態

【明報專訊】中文大學公布喜訊，醫學院助理院長（發展）黃秀娟獲選為2023年「新基石研究員」。呢個資助計劃係2022年由騰訊出資100億人民幣設立，而黃秀娟喺未來5年，每年可獲500萬人民幣資助做基礎研究。

5年各獲500萬人幣研究資助

據中大介紹，黃秀娟係國際知名腸道微生態專家，佢喺馬來西亞檳城出生，2009年喺英國讀完醫學博士，2010年來港加入中大醫學院。黃教授喺倫敦帝國學院攻讀博士學位時，已開始對腸道微生態着迷，致力研究炎症性腸病，佢喺2013年將腸道微生物移植技術引入香港，治療可致命嘅腸道感染疾病，仲喺2018年成立亞洲首間微生物移植及研究中心，係目前唯一向40多間公立醫院提供微生物移植服務嘅機構。

「新基石研究員項目」第二期名單公布，黃秀娟喺「生物與醫學科學」項目榜上有名，成為首位及唯一嘅香港學者。黃秀娟話，基石項目特色係「科學家主導」，無設定研究項目同期限，畀佢極大自由度做醫學科研。佢話自己會以「飲食習慣如何通過腸道菌群觸發慢性炎症及免疫功能障礙？」為題，再探究飲食同腸道菌群嘅相互作用，期望可開發個性化活菌治療新方案。