【Emily】宣傳西貢海藝術節 楊潤雄示範打卡位

【明報專訊】西貢海藝術節本月15日至1月14日舉行，文化體育及旅遊局長楊潤雄一向都支持呢項活動，前日去到滘西洲，率先參觀作品同埋幫手拍攝宣傳片。今年藝術展有新元素，除咗去年舊有擺設，今年會喺西貢海5個地方展出18件藝術品畀人「打卡」，局長更親身演繹，喺唔同嘅藝術裝置擺唔同pose，示範最佳打卡位置。

為期3年嘅西貢海藝術節項目由旅遊事務署策劃，今年以「再島嶼」為主題。楊潤雄話，同有份支持參與嘅村民交流，知道村民都好喜歡同年輕藝術家一齊創作藝術裝置，村民仲熱情介紹當地嘅歷史同生活情况。佢話呢種結合旅遊、藝術、大自然、生活文化同風土歷史嘅項目，「能夠說好西貢海以及村民的故事」，呼籲大家親身體驗。

睇番西貢海藝術節嘅網站，未來唔同日子有各種活動，包括薯莨試染工作坊、魚網編織體驗工作坊等活動。