【Emily】原中通社長讚李家超：雷霆手段，菩薩心腸

【明報專訊】內地官媒中通社噚日出稿，話特首李家超喺噚日8號內地記者節，同剛卸任嘅香港中通社原社長王佳斌見面，仲互送高帽。李家超大讚中通社長期支持政府，影響力大，「這是功力的體現，中通社有人才」；王佳斌就憶述同特首嘅結識，用上「雷霆手段，菩薩心腸」8個字嚟描述對李家超嘅印象。

李家超話，中通社多年嚟「說好香港故事、說好國家故事」、「積極參與本地輿論鬥爭」，又話中通社嘅報道影響力好大，佢個人覺得中通社文章選題到位、思路清晰、條理分明，好容易讀，感受好深。

王佳斌就話李家超「雷霆手段，菩薩心腸」，喺維護一國兩制、捍衛國家安全方面鋼鐵意志，「表現出男兒本色和英雄氣概」，但又話特首關心市民，對家人溫情真情，顯示出溫情嘅一面。