【Emily】夜繽紛3海濱吸逾27萬人次 黃偉綸：無特別計收益

【明報專訊】政府今年9月中開展「香港夜繽紛」活動，副財政司長黃偉綸噚日書面回覆議員質詢時話，至今有逾25個項目已經或正舉行。截至10月31日，3個海濱場地活動吸引咗約27萬人次。政府認為市民同埋遊客反應正面，會繼續利用節日元素，為市民提供更多活動選擇。佢話無特別估算「香港夜繽紛」可以為香港帶嚟幾多額外嘅旅客同經濟收益。

中秋綵燈66萬人次到訪

黃偉綸話，就政府部門舉辦嘅夜間活動嚟講，中秋節期間舉行嘅綵燈會累計約66萬人次到訪，當中維園嘅綵燈會有逾30萬人次；藝術館、科學館同太空館逢周五、周末同公眾假期延長開放，截至上月29日，3間博物館喺延長開放時段共錄得超過7200人次參觀。

黃偉綸話其他夜繽紛活動亦深受歡迎，例如有43萬人喺維港兩岸觀賞國慶煙花匯演、美酒佳餚巡禮錄得約14萬人次入場，個別商場亦都話人流有所增長。佢話會繼續吸納社會意見，適時檢視活動成效，並會聆聽持份者對未來發展嘅意見，繼續諗方法提振整體經濟。