【Emily】徐英偉稱牀蝨做「小朋友」 話港唔嚴重 酒店加強清潔

【明報專訊】牀蝨問題蔓延至港人旅遊熱點韓國，港府都喺機場加強宣傳，仲同酒店業開會避免牀蝨傳入本港。前民政事務局長、酒店業主聯會執行總幹事徐英偉噚日喺電台節目話，香港牀蝨情况唔算嚴重，業界亦會加強管理同清潔。講起牀蝨，徐英偉仲稱呼佢哋做「小朋友」，主持忍唔住問點解，佢解釋因為牀蝨細細隻，「通常我哋都係『好客』，個個都係朋友嚟嘅」。

徐話業界有同政府分享各地輸入情况，提及除咗整體歐洲同韓國，東南亞國家亦有較多個案。佢話酒店接待旅客有一定風險，本港過往有相關個案，但唔嚴重，?家業界已加強房間清潔，若發現牀蝨會用杜蟲藥及高溫消毒牀單等方法處理，相信就算發生個別個案，都可以好快杜絕。

徐英偉建議政府保持同海外衛生部門聯繫，確認爆發牀蝨危機嘅地區，並同高鐵、郵輪及航空公司等合作從源頭堵截，一旦發現爆發就及早通知市民。