【Emily】高中陝西團 教局邀隨行 議員意見多 激親梁美芬

【明報專訊】立法會內務委員會噚日討論教育事務委員會下月2日至5日隨學生團到內地考察，以了解高中公民與社會發展科嘅內地考察活動安排，但唔少議員對行程有意見。今次考察團主題係陝西歷史文化及航天科技，但唔少議員認為行程側重歷史文化，科技創新界議員邱達根更質疑，行程包括參觀一所航空或高科技企業，同「航天」有好大分別，「大人都成日搞錯，唔搞清楚（字眼）對學生唔係幾好」。

漁農界議員何俊賢就話，行程之一係參觀陝西供港蔬菜基地，對自己應否隨行感疑惑。新民黨主席葉劉淑儀更話行程似「旅遊套餐」，「含金量低」，又認為對要忙於區議會助選嘅議員唔公平。

李慧琼叫再同教局傾 梁：無必要拖

教育事務委員會主席梁美芬解釋，今次係應教育局邀請隨團了解考察團實况，而唔係議員考察團，認為改動行程機率唔高。內會主席李慧琼建議教育事務委員會同教育局再傾傾，押後一星期表決；梁美芬就認為無必要拖延，「一係同意一係唔同意」，但其黨友、經民聯林健鋒反駁「唔應該草率決定」，最終無表決，下周再交內會討論。

立法會初步計算，每個跟團議員嘅開支約13,500元，以暫時9個議員參加計，即涉12.1萬元。