【Emily】11‧19長者日 2000店舖有優惠

【明報專訊】嚟緊嘅星期日（19日）係「長者日」，為咗向老友記表達關懷同敬意，社會福利署籌辦「長者日消費優惠」活動，邀請咗本地超過2000間食肆、零售店舖及社會企業商戶，當日將向「長者咭」持有人提供折扣或優惠。參與商戶會喺當眼處張貼宣傳海報，方便長者識別。

Emily睇過啲優惠，發現好多大型連鎖快餐店同飲食集團包括美心MX、一粥麵、銀龍茶餐廳等都係參與商戶。好似大家樂同吉野家就因應「長者日」推出當日單一消費達一定金額，就享有6元至8元優惠；而老友記平時去開嘅酒樓，例如海港酒家同海港薈當日就免茶一位。

電器零售店如豐澤都推出唔同優惠，例如全線產品照優惠價再九折，買指定3款血壓計仲享有優惠價。