【Emily】前北九裁判院「開庭」 林定國任「法官」

【明報專訊】星期日法院一般休息唔開庭，但「北九龍裁判法院」噚日就特別「開庭」審理一宗販毒案，而律政司長林定國就轉換身分擔任案件「法官」，立法會議員顏汶羽就第一次體驗做「陪審員」。

北九龍裁判法院其實早於2005年停用，列入活化歷史建築伙伴計劃，香港善導會活化為普及司法教育中心。善導會噚日喺場內搞咗一場模擬審訊，審理一宗販毒案，由十幾名年輕人擔任唔同角色，年紀最細者就讀中二，席上仲有來自廣州嘅青年代表參與。學生都好認真投入，有人擔當控方及辯方律師、法庭書記、證人，以及陪審員角色。

林定國話，活動目的除咗畀大家更深刻認識香港司法制度，佢認為大家學習嘅關鍵在於溝通技巧同開放態度。佢話，最基本嘅溝通技巧包括說話音量適中、要懂得精準地提問；至於開放態度，係指大家接受新資訊或新事物時唔好先入為主，應先聽聽別人嘅說話，持開放態度，予人機會解釋，亦即係尊重別人發表意見嘅權利（right to be heard）。