【Emily】糧船灣半日遊新路線 不止自然美 仲有鄉村美

【明報專訊】講起糧船灣，好多人都會諗起岩柱群，其實除咗大自然美，仲有鄉村美。香港地質公園藉綠色旅遊推廣鄉郊村落文化歷史，特登設計全新嘅糧船灣半日遊路線，帶大家遊覽歷史建築，由11月11日開始仲會有街渡來往西貢同糧船灣，想探索隱世客家村落就更容易。

4村保留古樸風貌 天后宮藏四寶

政府新聞網介紹，糧船灣4條村落至今仲保留古樸風貌，東丫、北丫、白腊為客家村，沙橋係後期先興建嘅漁民村。遊人可揀由北潭涌搭小巴到萬宜路北丫村路口，沿山徑漫步，亦可由北丫碼頭出發到沙橋，兩公里路兩個鐘就行完，難度唔高。

途中會經過糧船灣最古老、屬三級歷史建築嘅天后宮，村民形容天后宮藏四寶，包括光緒十一年嘅木雕、天后誕天后娘娘神像出海巡遊所用龍轎、相傳掛龍船前可保百戰百勝嘅龍頭，及清乾隆六年鑄造嘅生鐵古鐘。

睇番資料，翠華船務嘅「西貢-滘西村-糧船灣」街渡已開通，周六、日及公眾假期行駛，正價65元。