【Emily】「桂冠論壇」雲集全球200科學家 李家超邀外地學者享受美食夜生活

【明報專訊】李兆基基金贊助嘅「首屆香港桂冠論壇」噚日起一連6日舉行，今次活動雲集全球近30個國家及地區近200名青年科學家，以「匯聚頂尖思維 啟發科學成就」（Meeting of Inspirational Minds）為主題作研討。出席活動開幕禮嘅特首李家超話，港府重視創科發展，會竭力搶人才、搶企業，仲向來賓推銷香港及大灣區發展優勢。佢又呼籲一眾外地科學家來港後可以享用文化設施、美食及體驗夜生活，然後將香港故事同親友分享。

論壇及活動包括有邵逸夫獎得獎者主講，科學家分科小組討論、全球趨勢話題環節、青年科學家簡報等，討論及分享內容主要圍繞邵逸夫獎涵蓋嘅三大範疇，由黑洞、細胞分子機制以至離散幾何學等課題。論壇參加者將會到訪本地大學、InnoHK創新研究中心、香港科技園創科體驗館、香港研發中心及數碼港等。

恒地主席、李兆基基金董事李家誠致辭時就話，基金十分榮幸可以贊助呢項世界級學術交流盛事，推動創新和科學，仲話基金和恒地致力培育青年，期望青年為香港、國家以至世界嘅可持續發展作出貢獻。