【Emily】愚人節前日辦全民反詐騙

【明報專訊】虛擬資產交易平台JPEX懷疑串謀詐騙案9月起受全城關注。協助JPEX案受害人嘅立法會選委界議員吳傑莊，噚日宣布成立民間組織「反詐騙大聯盟」，希望促進政府部門同民間合作，推廣防騙意識。吳傑莊話，將會喺明年3日31日、即係愚人節前一日舉辦「全民反詐騙日」，透過大型活動傳遞防騙信息，希望市民唔好受騙。

「反詐騙大聯盟」有多名聯合發起人及成員，包括曾任保安局長嘅新民黨黎棟國、前一哥鄧竟成、特首政策組經濟發展專家組顧問黎永良、港區人大代表朱立威、身兼元朗區議會主席嘅港區人大代表沈豪傑。聯盟會設立嚟自唔同界別嘅顧問團，包括法律專業人士、科技專業 、虛擬資產持牌機構等。

聯盟包括人代政協 研偕中央協作

本身係全國政協嘅吳傑莊提到，聯盟成員包括人代同政協，會研究提案或建議方法，同中央協作打擊跨境騙案；而由於唔少騙案受害人係專業人士，大聯盟初步目標走訪100個專業機構宣傳防騙。另外立法會今個月29日將討論吳傑莊提出有關防騙策略嘅議員議案，黎棟國就希望好似打預防針咁，畀市民喺最短時間內識別到詐騙手法，以防中計。