【明報專訊】《施政報告》提到， 政府下年上半年會制訂《香港氫能發展策略》，推動商務車同大型貨運車綠色轉型。城巴噚日公布，西九龍車廠嘅全港首個加氫站已經起好，預計喺安全檢測同員工培訓後，今年內正式啓用，為城巴氫能巴士加氫。
城巴話，首個加氫站集合卸氫、壓縮、製冷、加氫同遠程在線監察功能，操作簡易而且有智能監控，可以安全快捷咁為巴士加氫。
引入氫能巴士方面，城巴上年公布，將會引入同內地威馳騰（福建）汽車共同設計建造嘅全球首輛3軸雙層氫能巴士。城巴噚日話，呢架巴士上月中已經運抵香港，仲試咗喺加氫站加氫，過程順利，目前接受緊政府部門嘅車輛類型評定，通過就可以「出牌」喺路面行駛。
