【Emily】內地網民話港「金融遺址」 駐京辦：會強力否定

【明報專訊】立法會工商及創新科技事務委員會噚日開會，聽取駐外經貿辦同駐內地辦事處工作報告，委員會主席吳永嘉話留意到內地網上平台出現一啲抹黑香港嘅言論，「對香港非常之唔好嘅說法」，建議駐內地辦事處同內地網絡平台公司溝通下，「該刪帖就刪帖、該屏蔽就屏蔽」，又話「冇理由放之任之㗎嘛？任由佢哋抹黑香港『獨立地位』，同埋對國家所作出過嘅貢獻」。商經局長丘應樺回應話：「我諗（駐北京辦事處主任）鄭偉源先生聽得好清楚，佢返到北京會積極跟進呢方面嘅工作。」

議員話抹黑 促交涉屏蔽

吳永嘉話最近留意內地網上平台有意見話，「香港同兵馬俑差唔多啦將會，成為世界金融中心嘅遺址，又話以往曾經係不夜城，?家就淨係喺度喊『搞旺夜市』」。佢覺得呢啲內地網民對香港嘅「不公平抹黑」需要處理，希望丘局長可以叮囑內地相關同事跟相關網上平台溝通，「唔好畀呢個咁嘅風氣蔓延」。

鄭偉源話佢同同事一直有留意，「我哋會強力咁否定佢哋嘅一啲說法，亦都會去跟進，會睇下個源頭」，強調會繼續密切留意。