【Emily】司法機構擬明年初直播部分審訊

【明報專訊】司法機構向立法會提交文件，提到計劃出年年初就選定案件喺法院大樓外試行現場直播，準備就緒就會公布細節；不過就唔係所有司法程序都適合直播，?家仲研究緊原則同細節。Emily睇番資料，終院首席法官張舉能今年初喺法律年度開啟典禮話，直播司法程序最快今年內推行，當時被問到初選案等國安法案件會唔會直播，佢就答「你（記者）心目中諗緊嘅大案都已經會開審，唔會考慮得切住」，其他國安案亦要研究下。

文件又提到，司法機構舊年開始測試語音辨識軟件，計劃今年底前廣泛使用相關系統，方便法官同司法人員喺聆訊抄筆記同寫判案書。而畀市民電子方式處理文件同交錢嘅綜合法院案件管理系統，目標出年起推展至終院、高院、裁判法院非傳票法庭及小額錢債審裁處。佢哋亦研究緊將電子預約服務涵蓋埋喺高院處理嘅個人破產呈請，同遺產承辦處等。

至於喺銅鑼灣起緊嘅新區院大樓，計劃2027年底前配備資訊科技設施，亦會建立新嘅數據中心，取代高院嘅數據中心。