【Emily】長者做「無煙老友大使」 街站推廣戒煙

【明報專訊】香港吸煙與健康委員會每年都會舉辦「無煙老友記」計劃，今年邀請唔同長者中心嘅長者義工組成「無煙老友大使」，擔當同伴支持者，一齊推廣戒煙。委員會噚日舉辦宣傳活動，話為咗深入社區宣傳，喺11月至12月聯同一眾無煙老友大使喺各區設街站，加強推廣無煙信息同鼓勵吸煙者盡快戒煙。

委員會話，好多煙齡較長嘅人或受到坊間有關吸煙與戒煙嘅謬誤影響，未能下定決心戒煙，委員會主席湯修齊強調，遠離煙草係健康長壽嘅關鍵，無論幾時戒煙，都可以降低患上各種疾病嘅風險，改善呼吸系統同心血管系統功能，提升整體健康水平。

活動上，成功戒煙嘅長者李少麟、溫鐵亮分享自身戒煙經驗同得着，鼓勵吸煙者千祈唔好猶豫或誤信戒煙謬誤，立即為健康嘅「人生下半場」踏出第一步戒煙。