【Emily】大馬、越南軍艦訪港 同解放軍打友誼波

【明報專訊】馬來西亞同越南海軍兩艘軍艦上周五抵港訪問，係新冠疫後少有外國軍艦停靠香港。內地官媒報道，馬來西亞海軍「雪蘭莪」號巡邏艦同越南海軍「光忠」號護衛艦訪港4日，兩艦剛參與廣東湛江舉行嘅「和平友誼」多國聯合軍演，參與軍演嘅包括中國、柬埔寨、老撾、馬來西亞、泰國同越南6國。

據越南官方通訊社報道，柬埔寨、老撾、泰國嘅海軍都有訪港。通訊社引述「光忠」號指揮官話，今次軍演令參與國家可以交流同軍事合作，增進互信理解，提升區內反恐及維護海事安全嘅能力。

睇番兩艘軍艦訪港影片，艦艇駛入昂船洲軍事碼頭，現場軍樂隊喺歡迎儀式上奏起《歡迎進行曲》。根據越南軍方上載影片，外交部駐港特派員公署副特派員方建明、保安局長鄧炳強到場歡迎。據報，訪問期間，駐港解放軍部隊會同大馬、越南海軍舉行足球友誼賽等文化交流活動。