【Emily】借「軒公」過橋 候選人籲投「軒仔」 選舉論壇 羅文唱羅文《獅子山下》

【明報專訊】再出發大聯盟噚日起搞區議會選舉論壇，部分候選人諗計出位搶鏡，有人唱歌推銷自己，亦有人借歌手「過橋」。歌手張敬軒日前喺社交平台發帖，以「4號候選人」身分爭取叱咤頒獎禮嘅「我最喜愛男歌手」，而區選黃大仙西獨立候選人楊諾軒，噚日就話4號唔止有「軒公」，仲有「軒仔」，呼籲市民投佢一票。

候選人唔止講政見，無獨有偶，兩個觀塘北獨立候選人羅文同黃曉東，都喺問答及總結環節用「歌聲」傳達心聲，不過選曲同原因就唔一樣。

羅文總結發言時話溝通嘅過程總會有爭拗，但重要嘅係有溝通，其後就高歌同名歌手羅文《獅子山下》嘅一段，希望市民「拋棄區分求共對」。

黃曉東總結時就話會「唱好觀塘北演唱會」，希望街坊多加支持，更即場話要「用幾句歌」幫市民同政府打氣，於是用閩南話唱出「寶島歌王」葉啟田嘅名曲《愛拼才會贏》。

謝敏婷「出櫃」講錯「出軌」

至於Ig專頁有兩萬粉絲嘅「玄學小仙女」、九龍城南選人謝敏婷就話支持平權，講述性小眾面對情緒問題嘅困境，話佢哋要「出軌」，但幸好佢即時發現講錯，更正話同志要「出櫃」，唔係「出軌」。

2023年區議會參選名單詳見：link.mingpao.com/80815.htm