【Emily】車價800萬 城巴氫巴候命載客

【明報專訊】城巴舊年宣布引入全港首部雙層氫能巴士（圖），據了解，巴士終於通過政府嘅車輛類型評定，即將「出牌」載客，而城巴聽日會舉行啟動禮，特首李家超會成為首個氫巴乘客。城巴一直無透露氫巴價錢，不過Emily發現，海關近日喺汽車登記稅系統上載咗呢部巴士嘅資料，零售價原來係800萬元。

貴同廠電動巴四成

城巴氫能巴士由母​​公司匯達交通同「威馳騰（福建）汽車有限公司」一齊研發，型號喺海關紀錄為VV12HR。翻查海關資料，城巴旗下嘅電動巴士都係由威馳騰研發，零售價560萬元，而九巴嘅比亞迪雙層電動巴B12D就360萬元，換言之，城巴架氫巴貴過同廠嘅電動巴約四成，甚至係九巴電動巴嘅兩倍多。

城巴回覆話呢部係全球首部按香港環境研發嘅雙層三軸氫能巴士，相信新能源車嘅成本會隨技術發展同市場規模下降，期望多啲企業加入發展氫能。