【Emily】憶36年前赴京升學 梁美芬：七日冲一次涼

【明報專訊】政府與中聯辦噚日舉行「國家憲法日」座談會，基本法委員會委員、立法會議員梁美芬鼓勵青年到內地尋找發展機遇，佢喺對談環節憶述1987年到北京升學時內地好窮困，「國家真係窮到不得了，我哋七日先可以冲一次涼」、「最靚嘅水果都係出口㗎」。

籲掌握「30年再30年」內地機遇

梁美芬憶述於中大政政系畢業後，到北京研究憲法兩年半，冀為香港回歸後培養法律人才，佢形容當年內地好窮，無水供應，七日先可以冲一次涼。不過佢鼓勵青年認識憲法，了解國家發展方向，培養自己成為具國際視野、發揮中華民族優良傳統文化嘅中國人。「我1987年去咗內地，掌握咗過去30年嘅機遇，你哋仲有未來30年再30年嘅機遇。」

同場嘅全國人大代表陳曉峰就話，中央強調培養涉外法律人才，對法律有興趣嘅年輕人應把握機會。陳曉峰亦提到青年可善用本港優勢，喺人工智能、科技等產業發展。