【Emily】支援獨老 工聯多項建議叫關愛隊幫手 倡設傾訴流動站 開班教用WhatsApp微信

【明報專訊】政府喺18區成立關愛隊，支援地區工作同加強地區網絡，工作仲愈來愈多，既探訪獨老同雙老長者，又向劏房同「三無」大廈住戶派單張提醒預防蝨患。工聯會噚日發表獨居長者支援研究報告，立法會議員郭偉強、鄧家彪、陳穎欣同陸頌雄喺醫療、科技、社會服務等方面提出多項建議，包括設立長者傾訴流動站，當中唔少建議都有叫關愛隊幫手，例如開培訓班教老友記用WhatsApp同微信，甚至向獨居長者推廣綠色殯葬。

推廣綠色殯葬 多一可負擔選擇

陳穎欣建議喺設有長者屋邨中心嘅社區設立長者傾訴流動站，主動關心長者，民政事務處同醫衛局可以喺無長者屋邨中心嘅社區，分別動用關愛隊義工同聘請精神科醫生，巡迴協助流動站。佢又話，民政事務處應增加地區康健中心同關愛隊合作，收集流動站個案，將精神狀况較嚴重個案轉介醫衛局。

為加強對體弱獨老同雙老家庭支援，陸頌雄提議關愛隊以培訓班形式推動長者數碼共融，教長者用WhatsApp同微信與家人溝通，喺網上買嘢食同用政府平台、醫院預約服務等。郭偉强就提議，食環署同關愛隊、地區團體合作加強綠色殯葬宣傳，為獨居長者提供多一個負擔得起嘅選擇。